Prosiect Elis Sïon Siamas

Mae Prosiect Anterliwt Elis Sïon Siamas yn cyrraedd ei anterth yn y misoedd nesaf pan fydd Cwmni Sain yn taro ymweliad a Neuadd Brithdir i ffilmio’r gwaith ar gyfer cynhyrchu DVD ar arferion traddodiadau Cymreig.
Mae plant ysgol Brithdir wedi bod yn brysur iawn yn paratoi drama ar y Plygain, ysgol Rhydymain wedi bod yn canolbwyntio ar arferion casglu Calennig a’r Fari Lwyd wedi aros gydag ysgol Dinas Mawddwy. Yr amryddawn Twm Morys sy’n arwain y prosiect ac yn clymu’r cyfan at ei gilydd ac mae wedi bod yn ymweld â bob ysgol yn unigol ar gyfer yr holl waith paratoi ac ymchwil. Rydym yn edrych ymlaen am y ddau weithdy olaf sy’n cynnwys ymarfer at y cynhyrchiad a’r perfformiad yn ei gyfanrwydd.

Rydym wedi bod yn hynod ffodus o gael nawdd Asiantaeth Gelfyddydol Gwynedd a Môn i gynnal y prosiect uchelgeisiol yma ac mae ein diolch hefyd i’r ysgolion am eu parodrwydd i gyd weithio. Hoffwn ddiolch hefyd i gwmni Sain ac i Twm Morys sydd wedi gwneud tipyn o waith gwirfoddol fel rhan o’r prosiect.